Olíulekinn á Mexíkóflóa tvöfalt meiri en áður var talið

Nýjar mælingar á olíulekanum í Mexíkóflóa gefa til kynna að hann hafi verið allt að tvöfalt meiri en áður var talið.

Jarðfræðistofnun Bandaríkjanna segir að lekinn geti hafa numið allt að 40 þúsund tunnum á sólarhring áður en BP olíufélaginu tókst að koma tappa á olíuleiðsluna sem lekur í lok síðustu viku. Nú dælir BP um 15.000 tunnum úr leiðslunni um borð í tankskip á sólarhring.

Barack Obama bandaríkjaforseti og Carl-Henric Svanberg stjórnarformaður BP munu hittast eftir helgina til að ræða málið en Obama hefur verið harðorður í garð olíufélagsins síðan að lekinn hófst fyrir nokkrum vikum.