Skýrslur Bandaríkjamanna óþolandi

Óþolandi og óviðeigandi er í samskiptum vinaríkja að til séu leyniskýrslur um íslenska stjórnmálamenn og ekki síður að þær séu varðveittar með þeim hætti að þær leki ítrekað í fjölmiðla. Svo segir utanríkisráðherra, Össur Skarphéðinsson, um bandarískar skýrslur sem birtust um hann, Jóhönnu Sigurðardóttir forsætisráðherra og Albert Jónsson sendiherra á vef Wikileaks í gær.

„Þetta er í annað skipti sem þetta gerist og það þýðir að menn hafa varann á sér í samskiptum við utanríkisþjónustur sem haga sér með þessum hætti,“ segir Össur.

Æðsti yfirmaður bandaríska sendiráðsins á Íslandi hafi verið boðaður á fund með ráðuneytisstjóra utanríkisráðuneytisins þar sem þessu var mótmælt.

Fulltrúi Bandaríkjamanna hafi ekki getað skýrt lekann, en svo virðist sem upplýsingarnar hafi ekki komið úr sendiráðinu við Laufásveg.

„Þetta er alveg með eindæmum, ekki síst í ljósi þess að skýrslur sem menn vilja fá birtar, um nafngreinda Íslendinga, þær fást ekki birtar,“ segir hann og vísar þar til beiðni ráðuneytisins um að Bandaríkjamenn leyfi fjölskyldu Halldórs Laxness að sjá leyniskjöl um hann.

Í Wikileaks-skjölunum segir að Albert Jónsson, þáverandi sendiherra í Washington, hafi mótmælt því sem hann hafi talið ófullnægjandi útskýringar Bandaríkjamanna á fangaflugi CIA í íslenskri landhelgi. Samt hafi hann unnið að því með bandarískum diplómötum að gera lítið úr fangafluginu opinberlega.

Um þetta segir Össur: „Ég geri ráð fyrir því að Albert Jónsson, aðalræðismaður okkar í Færeyjum, hafi ekki gert neitt sem hann var ekki beðinn um af þáverandi yfirboðurum sínum, og hafi því ekki brotið nein fyrirmæli.“- kóþ