Reynt til þrautar að ná samkomulagi

Reynt verður til þrautar í dag að ná að samkomulagi í Icesave deilunni. Samninganefnd Íslands hefur verið í óformlegum samskiptum við Breta í morgun en engir formlegir fundir hafa enn verið boðaðir. Stjórnarandstaðan ætlar að stöðva allar tilraunir til að aflýsa þjóðaratkvæðagreiðslunni.

Engin niðurstaða lá fyrir eftir rúmlega fjögurra klukkustunda fund samninganefndar Íslands með Bretum í gær. Indriði H. Þorláksson, aðstoðarmaður fjármálaráðherra, sagði í samtali við fréttastofu í morgun að reynt verður til þrautar að ná samkomulagi í dag og hefur nefndin verið í óformlegum samskiptum við Breta frá því fundi lauk í gær. Engir formlegir fundir hafa þó verið boðaðir en líklegt þykir, að sögn Indriða, að nefndin fundi með Bretum síðar í dag.

Allt bendir nú til þess að þjóðaratkvæðagreiðslan um Icesave fari fram samkvæmt áætlun á laugardag. Fram kom í máli Jóhönnu Sigurðardóttur, forsætisráðherra, í fréttum Stöðvar 2 í gær að jafnvel þó að samkomulag náist við Breta í dag eða á morgun sé orðið of seint að aflýsa eða fresta atkvæðagreiðslunni.