Allt of mikil áhersla lögð á frjálsa samninga

Stjórnvöld hafa lagt allt of mikla áherslu á að bankarnir eigi að leysa úr vanda heimilanna á grundvelli frjálsra samninga, segir Gylfi Arnbjörnsson, forseti ASÍ. Hann segir að afstaða ASÍ hafi verið sú að þó það geti í sjálfu sér verið hið besta mál að ýta undir slíka frjálsa samninga, þar sem það eigi við, sé rangt að ganga út frá því að bankarnir muni nálgast þetta verkefni eins og um félagslegar stofnanir sé að ræða.

„Auðvitað munu þeir nálgast málið á grundvelli eigin hagsmuna og hagsmuna eigenda sinna - ekki almennings. Því hefur ASÍ haldið til streitu þeirri kröfu sinni og margítrekað hana, að það sé á ábyrgð stjórnvalda en ekki bankanna að leggja grunn að réttlátri og skilvirkri lausnum fyrir heimilin," segir Gylfi. Sérstaklega sé ASÍ umhugað um þann u.þ.b. fimmtung landsmanna sem ennþá býr við alvarlegan vanda 15 mánuðum eftir efnahagshrunið. Í nýlegri könnun ASÍ á högum almennings og þátttöku þeirra í þeim úrræðum sem mótuð hafi verið komur í ljós að þó þátttaka í þessum úrræðum hafi vissulega aukist sl. hálfa árið séu allt of margir ennþá í verulegum vanda.

„Þetta gengur ekki lengur og því skora ég á ríkisstjórn og stjórnarandstöðu til að sameinast um brýn úrræði bæði er varðar greiðsluaðlögun heimilanna og bætta réttarstöðu skuldara vegna gjaldþrota. Það er ástæða til þess að tengja þessa stöðu við gerð og þróun svokallaðs stöðugleikasáttmála frá því í júní á síðasta ári. Með þessum sáttmála tókust sögulegar sættir milli flest allra aðila á vinnumarkaði og stjórnvalda - samstaða sem hafði það að leiðarljósi að takast bæði á við efnahagshrunið og afleiðingar þess en leggja samtímis grunn að nýrri sókn í efnahags- og atvinnumálum byggt á varanlegum og trúverðugum stöðugleika," segir Gylfi.