Vilja ódýrari frístundir fyrir börn og unglinga

Borgarfulltrúar Samfylkingarinnar leggja fram á fundi borgarstjórnar síðar í dag tillögu um ódýrari frístundir barna og unglinga til að bregðast við erfiðri stöðu margra fjölskyldna í borginni.

Í tilkynningu frá Degi B. Eggertssyni, oddvita flokksins, kemur fram að tillagan gengur út á að að Reykjavíkurborg gangi til viðræðna við íþróttafélög, æskulýðssamtök, tónlistar- og listaskóla og aðra aðila sem sinna uppbyggilegu frístundastarfi í borginni. Markmiðið með slíkum viðræðum verði að lækka kostnað fjölskyldna og einfalda aðgengi barna og unglinga að íþróttum, frístundum og listnámi.

„Þannig verði stefnt að almennari og meiri þátttöku á verði sem fleiri ráða við. Sérstaklega verði hugað að úrræðum þeirra sem búa við þröngan fjárhag heima fyrir. Í samvinnu við foreldra og forystu þeirra sem fyrir starfseminni standa verði horft til kostnaðar vegna æfingagjalda, fjölda æfinga og kennslustunda, hóptíma í stað einkakennslu þar sem því verður við komið auk útgjalda vegna ýmis konar fatnaðar, búnaðar og ferðalaga," segir í tillögu Samfylkingarinnar.

Jafnframt verði í hverju hverfi og hverjum skóla hugað að leiðum til að frístundir verði hluti af samfelldum skóladegi þannig að dregið verði úr þörf fyrir dýrt skutl foreldra.