Úrslit í samkeppni um styttu af Tómasi kynnt á morgun

Úrslit í samkeppni um styttu af Tómasi Guðmundssyni verða kynnt við opnun sýningar á tillögum á þriðjudaginn 19. janúar klukkan eitt í Fógetastofum, Aðalstræti 10 í Reykjavík.

Borgarstjórn samþykkti á fundi sínum 16. september 2008 tillögu Kjartans Magnússonar um að gerð yrði myndastytta af Tómasi Guðmundssyni og henni komið fyrir á áberandi stað í borginni. Í greinargerð var lögð áhersla á að Tómas Guðmundsson væri eitt af ástsælustu skáldum þjóðarinnar og oft kallaður borgarskáldið, en hann varð einna fyrstur til að yrkja af aðdáun og áhuga um Reykjavík.

Menningar- og ferðamálaráð ákvað að láta halda lokaða samkeppni með forvali í samræmi við samkeppnisreglur Sambands íslenskra myndlistarmanna. Í júní 2009 var auglýst eftir tillögum. Þriggja manna forvalsnefnd var falið að velja þrjá myndlistarmenn úr innsendum umsóknum til þess að vinna tillögur. Forvalsnefndin var skipuð Helga Kristjánssyni, fyrir hönd menningar- og ferðamálaráðs, Hafþóri Yngvasyni fyrir hönd innkaupanefndar Listasafns Reykjavíkur og Þóru Sigurðardóttur, fyrir hönd Sambands íslenskra myndlistarmanna. Listamennirnir sem voru valdir skiluðu svo inn tillögum sínum í október 2009 og var þriggja manna dómnefnd falið að velja úr tillögunum.