Skikka má foreldri til umgengni

Nefnd dóms- og mannréttindamálaráðherra leggur til margvíslegar breytingar á lögum sem lúta að forsjá barna, búsetu og umgengni. Nefndin skilaði frumvarpi og greinargerð til Rögnu Árnadóttur ráðherra á þriðjudag. Nefndin var skipuð í desember 2008.

Meðal þess sem lagt er til í tillögum nefndarinnar er að dómurum verði veitt heimild til að ákveða að foreldrar skuli fara sameiginlega með forsjá barns, þótt annað foreldra sé því andvígt. Ræður þá mat dómarans um að sameiginleg forsjá þjóni hagsmunum barnsins. Þá getur dómari kveðið á um umgengni foreldris við barn í allt að sjö daga af hverjum fjórtán, að kostnaði við umgengni verði skipt og að forsjárlausir foreldrar fái aðgang að skriflegum upplýsingum skóla.

„Einnig er lagt til að dómurum verði veitt heimild til þess að leysa sérstaklega úr ágreiningi foreldra um lögheimili án þess að forsjármál sé rekið samhliða. Ekki er á hinn bóginn lagt til að barn geti átt lögheimili á tveimur stöðum samtímis,“ segir í greinargerð á vef ráðuneytisins.

„Efnislega má segja að frumvarpsdrögin skapi skilnaðarbörnum og foreldrum þeirra – allt að því – sambærilega réttarstöðu og þekkist á Norðurlöndum,“ segir Lúðvík Börkur Jónsson, varaformaður Félags um foreldrajafnrétti, í greinargerð á vef félagsins. - óká