Kolkrabbarnir gleðja gestina

Fjórir kolkrabbar komu á Fiskasafnið í Vestmannaeyjum um miðja viku. Einn þeirra er sá stærsti sem komið hefur á safnið, á bilinu 60 til 70 sentímetra langur. Hann hefur fengið nafnið Vídalín, enda veiddur af skipverjum á Jóni Vídalín.

Kolkrabbarnir eru yfirleitt feimin dýr, en Vídalín sker sig úr og skemmtir gestum safnsins með því að synda hratt um búrið sitt. Hann er af tegundinni vörtusmokkur sem er nokkuð algeng hér við land. Kolkrabbar eru taldir gáfaðastir hryggleysingja og eru með þrjá heila. Þeir geta til dæmis lært að skrúfa lok af krukku sem inniheldur fæðu. - bj