Ný ríkisstjórn skrifuð í skýin

Þór Saari, þingmaður Hreyfingarinnar, telur að komið sé að leiðarlokum hjá Jóhönnu Sigurðardóttur, forsætisráðherra, og Steingrími J. Sigfússyni, fjármálaráðherra. Þau hafi framið pólitískt sjálfsmorð í Icesave málinu. Hann segir að ný ríkisstjórn sé skrifuð í skýin.

„Það hefur verið með ólíkindum að fylgjast með hversu meðvitaðir þingmenn ríkisstjórnarflokkana eru um að komið er að leiðarlokum fyrir Steingrím og Jóhönnu. Ný ríkisstjórn er skrifuð í skýin. Þau hafa í raun framið pólitískt sjálfsmorð með framgöngu sinni og hroka gagnvart þingi og þjóð í þessu Icesave máli og drögin að því sjálfsmorði voru skráð alveg frá upphafi þess," segir Þór í pistli á heimasíðu sinni.

Þór segir að enn á ný reyni Jóhanna og Steingrímur að eyðileggja málið með linnulausum áróðri og blekkingum þegar þau kalli þjóðaratkvæðagreiðsluna sem fer fram á morgun marklausa vegna nýs og betra tilboðs frá Bretum og Hollendingum. „Þess ber að geta að þetta blessaða tilboð er þó þrælvont og litlu skárra en lögin sjálf og færi aldrei gagnrýnislaust gegnum þingið. Engu að síður nota þau það sem áróðurstæki til að reyna að bjarga sínu pólitíska lífi, sem þau virðast ætíð tilbúin að setja ofar sannleikanum og ofar almannahagsmunum," segir Þór sem ætlar kjósa á morgun gegn Icesave lögunum sem Alþingi samþykkti í árslok 2009. Pistilinn er hægt að lesa hér.