Bráðadeildir sameinaðar í eina

Göngudeild bráðadeildar Landspítala hefur tekið til starfa á annarri hæð Landspítalans í Fossvogi. Fyrsti starfsdagur hennar var í gær, en hún er opin virka daga frá klukkan átta að morgni til ellefu að kvöldi og milli klukkan 12 og 20 um helgar og á hátíðisdögum.

Opnun göngudeildarinnar er sögð vera liður í sameiningu á tveimur stærstu bráðamóttökum spítalans í lok mars 2010 í eina bráðadeild í Fossvogi. „Sú bráðadeild verður á tveimur hæðum, í núverandi húsnæði slysa- og bráðadeildar og á næstu hæð fyrir ofan,“ segir í tilkynningu Landspítalans. Bráðavakt á neðri hæðinni annast bráðveika einstaklinga, en gönguvakt þá sem eru minna veikir eða slasaðir.

Við komu á bráðadeild verður fólk flokkað samkvæmt bráðaflokkunarkerfi í fimm flokka. Í fyrsta flokk fara þeir sem eiga í bráðum vanda, en í fimmta flokk þeir sem eru í minni háttar vanda. „Því lægri flokkun sem einstaklingur fær þeim mun bráðari telst vandinn og viðkomandi fer framar í forgangsröð en sá sem flokkast hærra.“

Fram kemur í frétt spítalans að unnið verði að breytingum á húsnæði nýrrar bráðadeildar til marsloka. Er fólk beðið um að taka tillit til þessa og um leið minnt á að hægt sé að leita með ýmis bráðavandamál til heilsugæslustöðva. - óká