Frysting á loðnu er hafin uppi á Skaga

Fyrsta loðnufarminum var landað í gærkvöldi hjá landvinnslu HB Granda á Akranesi. Loðnuhrognavinnslan og frystingin útheimtir þrjátíu manns sem mun vinna hluta tímans á tvöföldum vöktum.

Loðnuskip HB Granda, Ingunn AK og Faxi RE, hafa verið að veiðum úti af Garðskaga og því er stutt að fara með hráefnið til vinnslu.

Að sögn Gunnars Hermannssonar, vinnslustjóra í hrognavinnslu HB Granda á Akranesi, er óvíst hve mikil hrognafyllingin er í loðnuaflanum sem fengist hefur síðustu daga en hann segir þó að þroski hrognanna skipti meira máli en sjálf hrognafyllingin.

„Hrognin þurfa að vera með svokallaðan 80 prósenta þroska hið minnsta til þess að þau séu hæf til frystingar fyrir Japansmarkaðinn. Minna þroskuð hrogn eru fryst fyrir Austur-Evrópumarkaðinn,“ segir Gunnar í viðtali á heimasíðu fyrirtækisins. Afköstin í hrognavinnslunni á Akranesi ráðast af frystigetunni en hún er um hundrað tonn á sólarhring. Afkastagetan í flokkun, skurði og hreinsun á hrognum fyrir þurrkun og frystingu er þó mun meiri, eða um 160 til 180 tonn á sólarhring. - shá