Stígamót krefjast úrbóta

Of mikil áhersla er á líkamsmeiðingar í lögum um nauðgun, Stígamót krefjast úrbóta.

Stígamót kynntu ársskýrslu sína fyrir árið 2009 í dag en samtökin fagna nú 20 ára afmæli sínu. Í ársskýrslunni eru þvingunaraðferðir sem notaður eru við nauðganir kortlagðar. Samkvæmt tölum Stígamóta eru líkamsmeiðingar ekki notaðar nema í tæplega 20% tilvika en þess í stað eru hótanir og annað því um líkt mun algengari þvingunaraðferð. Þetta er að mati Stígamóta ein af þeim ástæðum fyrir því að fjöldi nauðgunardóma er mun færri en tilkynntar nauðganir ár hvert.

Guðrún Jónsdóttir, talsmaður Stígamóta, sagði samtali við fréttastofu að þessar tölur sýni að það sé kynferðislegt sjálfræði sem sé vanvirt þegar kynferðisofbeldi er framið og því ættu nauðgunarákvæði hegningarlaganna að endurspegla það.