Banaslysið í Silfru: öndunargríman losnaði

Kafarar eru ósáttir við yfirlýsingar lögreglunnar í Árnessýslu í gær vegna banaslyssins í Silfru. Lögreglan sagði í gær að svo liti út fyrir að bilun hefði orðið í köfunarbúnaði. Vísir hefur rædd við kafara sem voru á slysstað í gær. Franski kafarinn lést þegar hann reyndi að bjarga unnustu sinni sem sat föst í helli á níu metra dýpi í gjánni.

Tobias Klose rekur fyrirtækið Dive. Hann var á Þingvöllum í gær ásamt syni sínum. Hann segir rétt að köfunarbúnaðurinn hafi verið frá honum en ekki líti út fyrir að búnaðurinn hafi bilað. "Ég kom þarna að og hjálpaði við björgunaraðgerðir," segir Tobias sem finnst yfirlýsingar lögreglunnar bera vitni um fljótfærnishátt.

Vísir ræddi við Ómar Hafliðason atvinnukafari, sem er faðir starfsmanns Exist sem skipulagði köfunarferð franska parsins og var með þeim þegar stúlkan festi sig. Hann segir stúlkuna hafa verið með varalunga hangandi á sér sem hafi klemmst milli steina í helli á um níu metra dýpi.

"Þeir reyna að bjarga henni en hún berst um," segir Ómar en sonur hans skaust upp á yfirborðið eftir hjálp. "Það var fullt af köfurum þarna í kring og hann biður um aðstoð auk þess að hringja íneyðarlínuna. Þegar hann kemur aftur niður er konan orðin máttlítil og honum tekst að losa hana. Maðurinn hennar var fyrir aftan hana en þegar konan syndir upp á yfirborðið er maðurinn horfinn."

Sonur Ómars leitaði að manninum en mikið ryk hafði þyrlast upp og skyggni var orðið slæmt. Að lokum finnur hann manninn á rúmlega þrjátíu metra dýpi og hafði þá lunga hans og öndunargríma losnað - trúlega í átökunum við að bjarga konunni.

"Það var loft á kútnum hans en öndunarbúnaðurinn var laus," segir Ómar sem líkt og Tobias finnst lögregluna hafa verið fljót á sér að ýja að því í gærkvöldi að bilun hafi orðið í köfunarbúnaði. Þarna sé um mannlegan harmleik að ræða og málið muni að sjálfsögðu verða rannsakað í þaula.