Málning á Suðurlandsvegi: Lögreglan óskar eftir vitnum

Lögreglan á höfuðborgarsvæðinu óskar eftir vitnum að atviki á Suðurlandsvegi, skammt norðan Bláfjallaafleggjarans, eftir hádegi síðastliðinn fimmtudag, 24. júní.

Eins og Vísir greindi frá, skömmu eftir atburðinn, féll málningarfata af ökutæki og slettist úr henni á nokkra bíla sem á eftir komu. Í kjölfarið var veginum lokað þar til hreinsunarstarf hafði farið fram. Var það gert bæði til að koma í veg fyrir skemmdir á fleiri ökutækjum en ekki síður til að koma í veg fyrir slys en bílar geta hæglega runnið til á veginum við slíkar aðstæður.

Smári Örn Árnason var einn þeirra sem keyrði yfir málninguna sem var á veginum. Bíllinn hans varð fyrir miklu tjóni að hans sögn. Hann kvartaði undan því hversu lengi hann beið eftir lögreglunni en margir ökumenn keyrðu af vettvangi. „Við erum þau einu sem nennum að bíða ennþá eftir lögreglunni, hinir eru bara farnir, enda beðið í tvo klukkutíma," sagði Smári skömmu eftir atburðinn.

Þeir sem kunna að búa yfir upplýsingum um málið eru vinsamlegast beðnir um að hafa samband við lögreglustöðina á Krókhálsi í Árbæ í síma 444-1190 á skrifstofutíma.