RÚV varar bjórframleiðenda við vegna áfengisauglýsingar

"Það er best að taka það fram strax að persónulega skil ég og styð eindregið viðleitni Foreldrasamtakanna til að sporna gegn drykkju barna og unglinga," segir Páll Magnússon, útvarpsstjóri RÚV, vegna kæru Foreldrasamtaka gegn áfengisauglýsingum, en samtökin hafa kært RÚV fyrir birtingu á þremur auglýsingum þar sem léttöls-merkið á að hafa vantað.

Páll segir að hvort sem mönnum líki betur eða verr þá séu hinvar svokölluðu „léttölsauglýsingar" löglegar.

Svo virðist sem það hafi gleymst að setja fyrirvara á auglýsinguna sem RÚV birti. Páll segir eftirlit sem RÚV hefur með slíkum auglýsingum hafa brugðist í því tilviki.

„Af því tilefni höfum við hert okkar eigin eftirlit og sent viðkomandi auglýsanda harðorða athugasemd og viðvörun," segir Páll.

Spurður hvort það sé ekki sanngjörn krafa um að takmarka auglýsingar af þessu tagi svarar Páll:

„Það er ekki á valdi RÚV að setja aðrar takmarkanir á auglýsingar af þessu tagi en gert er í lögum. Baráttufólk gegn þessum auglýsingum verður að beina spjótum sínum að Alþingi og mér finnst reyndar sérkennilegt að meginþungi baráttunnar skuli ekki vera á þeim vettvangi. Þar er lögum breytt - ekki í Ríkisútvarpinu."

Samkvæmt útvarpslögum er auglýsandi ábyrgur fyrir auglýsingum sínum. Það kemur mjög skýrt fram. Páll áréttar þó að RÚV firri sig ekki ábyrgð:

„Við höfum uppi eftirlit með auglýsingum af þessu tagi og margoft hafnað birtingu þeirra ef við teljum þær brjóta í bága við lög."