Tungulækur í Landbroti flæðir yfir bakka sína

Tungulækur í Landbroti sunnan Kirkjubæjarklausturs flæðir nú yfir bakka sína og Grenlækur er bakkafullur, að sögn Björgvins Harðarsonar, bónda á Hunkubökkum. Ástæðuna má rekja til hlaupsins í Skaftá, sem náði hámarki fyrr í vikunni, en það veldur nú flóðum í ám og vötnum sem renna undan Eldhrauni.

Björgvin, sem sér vel yfir Eldhraun frá Hunkubökkum, segir óhemju mikið vatn í hrauninu. Vegurinn að bænum Skál sé mikið skemmdur og farinn í sundur á nokkrum stöðum.

Vatnsrennsli í Grenlæk hefur haldið áfram að aukast í dag frá því í gær og sýna rennslismælar vatnamælinga að það hefur sjöfaldast á undanförnum dögum og vatnshæðin tvöfaldast. Óvenju mikið flóðvatn rann út á Eldhraun en Grenlækur er við suðausturjaðar hraunsins.