Endurtalið í Hafnarfirði

Atkvæði í prófkjörum Samfylkingar og Sjálfstæðisflokks í Hafnarfirði verða endurtalin þar sem fáum atkvæðum munaði milli manna. Tveimur atkvæðum munaði til að mynda á efstu mönnum í prófkjöri sjálfstæðismanna.

Í prófkjöri Samfylkingarinnar breytist innbyrðis röð efstu átta manna talsvert eftir að fyrstu tölur voru birtar þar sem fáum atkvæðum munaði milli frambjóðenda. Kjörstjórn ákvað í gærkvöldi að telja aftur og ætlar að ljúka því verki fyrir mánudagskvöld.

Tveimur atkvæðum munaði á Rósu Guðbjartsdóttur og Valdimar Svavarssyni þegar talningu lauk hjá sjálfstæðismönnum. Valdimar hlaut 460 atkvæði í fyrsta sæti en Rósa 458. „Svona hlutir geta gerst í prófkjörum og maður veit það áður en maður gefur kost á sér í slíka baráttu," segir Rósa. Hún telur eðlilegt að atkvæðin séu endurtalin þegar svo litlu muni milli frambjóðenda. Hún á von á því að endanleg niðurstaða liggi fyrir eftir helgi.

Rósa segist taka niðurstöðunni í gær með jafnaðargeði. „Auðvitað fer maður í svona baráttu til að sigra en ég hef beðið miklu stærri ósigra í lífinu en þennan. Ég mun bara taka þessu og leggja Sjálfstæðisflokknum lið þannig að við fáum góða útkomu í vor."

1224 greiddu atkvæði í prófkjöri Sjálfstæðisflokksins og 1127 hjá Samfylkingunni. Rósa segir þátttökuna í prófkjörinu góðan stuðning við Sjálfstæðisflokkinn inn í komandi kosningabaráttu. Hafnfirðingar hafi greinilega tekið eftir góðum verkum Sjálfstæðisflokksins í bæjarstjórn. „Þær tillögur sem við höfum verið að leggja fram hafa augljóslega náð til fólks."