Svandís svarar Samtökum atvinnulífsins fullum hálsi

Svandís Svavarsdóttir, umhverfisráðherra, gefur lítið fyrir bréf Vilmundar Jósefssonar, formanns Samtaka atvinnulífsins til forsætisráðherra. Hún segir að Vilmundur verði að sætta sig við að hér sitji lýðræðislega kjörinn þingmeirhluti. Svandís segir þörf á meira skapandi mönnum í forystu Samtaka atvinnulífsins.

Vilmundur segir í bréfinu að Svandís hafi stórskaðað endurreisn íslensks atvinnulífs þegar hún synjaði aðalskipulagi Flóahrepps staðfestingar. Hann segir jafnframt að forsætisráðherra hljóti að velta fyrir sér stöðu Svandísar sem ráðherra.



Óskýr niðurstaða

„Það er misskilningur hjá Vilmundi að Samtök atvinnulífsins stjórni hverjir sitji við ríkisstjórnarborðið," segir Svandís. „Þó að Samtök atvinnulífsins hafi haft sterk ítök í landinu síðustu 18-20 ár þá hefur það breyst. Það er lýðræðislega kjörinn þingmeirihluti hér sem skipar til verka í framkvæmdavaldinu samkvæmt lögum og það er kannski tilhugsun sem þessi ágæti maður þarf að fara að venjast."

Svandís segist hafa ákveðið að áfrýja dómi Héraðsdóms Reykjavíkur um skiplagsmál í Flóahreppi þar sem niðurstaða dómsins sé óskýr og lítið rökstudd. Hún segir mikilvægt að Hæstiréttur komist að skýrri niðurstöðu í þessu máli þannig að réttaróvissu verði eytt og réttaröryggi í meðferð skipulags- og byggingarmála verið tryggt.

Óábyrgar yfirlýsingar

Svandís segir að um kunnuglegar yfirlýsingar sé að ræða. „Það var þannig þegar að ákvörðun um Suðvesturlínu tafðist um nokkrar vikur bar ég ábyrgð á öllu atvinnuleysi á Íslands að sögn Vilhjálms Egilssonar sem er félagi Vilmundar í Samtökum atvinnulífsins. Það er í þessum anda sem þessir menn, Árni Johnsen og Gunnar Birgisson eru að tala. Þannig að það er orðin ágætis sveit manna sem velur þessa aðferð við að greina ástand mála og sætir furðu að þeir skuli gera það með svo óábyrgum hætti."



Vilja hengja umhverfisráðherra

Þá segir Svandís: „Ef að þeir ætla að leysa þann alvarlega vanda sem upp er komin í íslensku samfélagi með því að hengja einn umhverfisráðherra þá lýsi ég nú eftir meira skapandi mönnum í forystu fyrir Samtök atvinnulífsins."