Svandís áfrýjar dómi vegna óskýrra laga

Svandís Svavarsdóttir umhverfisráðherra hefur áfrýjað dómi Héraðsdóms Reykjavíkur þar sem synjun hennar á þeim hluta aðalskipulags Flóahrepps er varðar Urriðafossvirkjun var ógilt. Hún segir ástæðuna vera þá að hún vilji skýrari leiðsögn um það hver megi koma að kostnaði við skipulagsgerð.

Forsaga málsins er sú að Flóahreppur og Landsvirkjun gerðu árið 2007 með sér samkomulag sem fól meðal annars í sér að Landsvirkjun skyldi kosta skipulagsgerð vegna fyrirhugaðrar virkjunar við Urriðafoss.

Eftir nokkurt þóf, þar sem samningnum var meðal annars breytt eftir kærumál, barst skipulagstillagan umhverfisráðuneytinu í mars 2009, en í janúar síðastliðnum neitaði ráðherra að staðfesta skipulagið því hún efaðist um lögmæti aðkomu Landsvirkjunar.

Flóahreppur kærði synjunina og héraðsdómur ógilti hana á þeim grundvelli að lög bönnuðu ekki að framkvæmdaraðili greiddi fyrir kostnað vegna skipulagsvinnu.

Svandís segir í samtali við Fréttablaðið að dómurinn hafi hins vegar ekki verið nógu skýr og því hafi hún áfrýjað. „Þetta er skilið eftir opið, en ekki bara hvað varðar þessa löggjöf.“

Tryggja þurfi að rekstrargrunnur sveitarfélaga komi úr almennum sjóðum svo almannahagsmunum sé ekki ógnað með þrýstingi frá kostendum.

Athygli vekur að í nýjum skipulagslögum, sem samþykkt voru í síðasta mánuði og taka gildi í upphafi næsta árs, segir að ef þörf sé á sveitarstjórn megi innheimta gjald fyrir skipulagsvinnu sem nauðsynleg er vegna framkvæmda.

Svandís segir að þó að ný lög séu skýrari tiltaki þau ekki frekar en héraðsdómur með tæmandi hætti hverjir megi koma að málum.

„Það er grein í nýju lögunum þar sem gert er ráð fyrir að gera megi samning við þriðja aðila um aðkomu að kostnaði. En með hvaða hætti það er gert og hvernig það er útfært er ekki skýrt.“ Á meðan eru skipulagsmál Flóahrepps í biðstöðu.

Margrét Sigurðardóttir sveitarstjóri segir í samtali við Frétta­blaðið að nóg sé komið. „Við erum búin að bíða allt of lengi og bíðum enn og í mínum huga er þetta sóun á tíma og peningum.“

thorgils@frettabladid.is