SA: Svandís hefur stórskaðað endurreisn íslensks atvinnulífs

Vilmundur Jósefsson, formaður Samtaka Atvinnulífsins hefur sent Jóhönnu Sigurðardóttur forsætisráðherra bréf þar sem skorað er á hana að sjá til þess að ríkislögmaður falli þegar frá áfrýjun vegna ógildingar héraðsdóms á ákvörðun umhverfisráðherra að synja aðalskipulagi Flóahrepps staðfestingar. Hann segir að Svandís Svavarsdóttir hafi með ákvörðun sinni stórskaðað endurreisn íslensks atvinnulífs.

Héraðsdómur Reykjavíkur ógilti ákvörðun Svandísar Svavarsdóttur umhverfisráðherra um að synja staðfestingar aðalskipulagi Flóahrepps. „Dómurinn vísaði til þess að ekkert í lögum bannaði að framkvæmdaaðili greiddi kostnað við aðal- eða deiliskipulag. Ástæða þess að umhverfisráðherra synjaði skipulaginu staðfestingar var sögð að Landsvirkjun hefði greitt kostnað vegna skipulagsvinnu við fyrirhugaða Urriðafossvirkjun," segir í bréfinu um leið og bent er á að þann 23. september síðastliðinn hafi Alþingi samþykkt ný skipulagslög þar sem sveitarfélögum er sérstaklega heimilað að innheimta kostnað vegna skipulagsvinnu í þágu einstakra framkvæmda.

„Hver svo sem niðurstaða Hæstaréttar kann að verða mun áfrýjunin engin áhrif hafa önnur en að tefja framgang við skipulag Flóahrepps. Hæstiréttur mun ekki breyta þeim lögum sem nýlega voru samþykkt," segir Vilmundur einnig.

„Því er hér með skorað á yður að sjá til þess að ríkislögmaður falli þegar frá umræddri áfrýjun sem ekki mun hafa neitt í för með sér annað en kostnað fyrir ráðuneyti yðar."

Að lokum segir Vilmundur að Samtök Atvinnulífsins álíti að umhverfisráðherra hafi með framferði sínu í þessu máli „sýnt óbilgirni og þjónkun við þrönga pólitíska hagsmuni og þar með stórskaðað endurreisn íslensks atvinnulífs. Slíkt framferði gengur þvert á öll loforð forsvarsmanna ríkisstjórnarinnar og hlýtur forsætisráðherra að velta fyrir sér stöðu ráðherra sem þannig haga sér."

Pistill um málið á heimasíðu SA.