Ung kona grunuð um að smita HIV með gáleysislegri hegðun

Landlæknisembættinu tókst ekki að koma lögum yfir unga HIV-smitaða konu sem grunur lék á að hefði smitað aðra með gáleysislegri hegðun. Sóttvarnarlæknir segir að rannsakað sé hvort fjölgun HIV-smitaðra hér á landi megi hugsanlega mega rekja til þessa máls.

Unga konan sem um ræðir er sprautufíkill sem smituð er af HIV-veirunni. Árið 2007 var nýgengi smitaðra mjög mikið meðal sprautufíkla. Ótti vaknaði hjá starfsmönnum Landlæknisembættisins vegna þessa og beindist athyglin að ungu konunni. Reynt var að veita henni aðstoð á grundvelli sóttvarnarlaga en aðstoðinni hafnaði hún alfarið og fór málið fyrir héraðsdóm.

Bergþóra Karlsdóttir hjúkrunarfræðingur á göngudeild smitsjúkdóma segir skelfilegt að ekki hafi verið hægt að grípa í taumana á þessum tíma. Dómurinn hafi slegið vopnin úr höndum heilbrigðisstarfsmanna. Nú hafi nýgengi á HIV aukist mikið meðal sprautufíkla.

Til að mynda greindust fimm í fyrra með veiruna og segir Haraldur að nú standi yfir rannsókn hvort það hópsmit tengist máli stúlkunnar frá árinu 2007.

Bergþóra segir þróunina geigvænlega. En heilbrigðisstarfsmenn geti lítið annað gert en hvetja fólk til að deila ekki nálum, stunda ábyrgt kynlíf og muna að nota smokkinn. Slíkar ráðleggingar dugi þó skammt þegar fólk sé undir áhrifum fíkniefna og því skeytingarlaust og sljótt um heilsu sína og annarra.

Í starfi sínu hafi hún fengið innsýn í skelfilegan veruleika margra fíkla. Dæmi séu um að ungir fíklar séu þvingaðir í vændi til að vinna fyrir efnunum.