Íslendingur fann 130 þúsund ára gamalt bein úr hvítabirni

Íslenskur prófessor hefur, ásamt norskum starfsbróður sínum, fundið bein úr hvítabirni sem talið er vera allt að 130 þúsund ára gamalt.

Beinið, sem talið er vera úr kjálkanum á dýrinu, er sennilegast elsti hvítabjörnssteingervingur sem fundist hefur. Það voru Ólafur Ingólfsson, prófessor við Háskóla Íslands, og Oystein Wiig, professor við Háskólann í Osló, sem fundu beinið á Svalbarða.

Þessi beinafundur hefur orðið tilefni til nýrra kenninga um það hvernig hvítabirnir þróuðust, að því er fram kemur í breska blaðinu Times. Vísindamennirnir telja að lífsýni úr steingervingnum bendi til mikils skyldleika á milli hvítabjarna og skógarbjarna á þessum tíma. Þeir velta því fyrir sér hvort ísöld sem brast á fyrir 190 þúsund árum hafi orðið til þess að skógarbirnir hafi aðlagast umhverfinu tiltölulega hratt og orðið að hvítabjörnum.