Vilja endurskoða hugmyndir um fækkun ráðuneyta

Flokksráðsfundur Vinstrihreyfingarinnar græns framboðs sem haldinn haldinn á Akureyri um helgina skorar á stjórn og þingflokk VG að áform um endurskipulagningu stjórnarráðsins verði endurskoðuð í ljósi breyttra aðstæðna og yfirfarin áður en frekari skref verða tekin.

Í frumvarpi sem til stendur að ríkisstjórnin leggi fyrir Alþingi verður kveðið á um sameiningu sjávarútvegs- og landbúnaðarráðuneytisins og iðnaðarráðuneytisins í eitt atvinnuvegaráðuneyti. Í tengslum við það verður endurskoðuð verkaskipting milli nýs atvinnuvegaráðuneytis og umhverfisráðuneytis með stofnun umhverfis- og auðlindaráðuneytis.

Í ályktun flokksráðsins segir að á næstu árum muni grunnatvinnuvegir þjóðarinnar, svo sem landbúnaður og sjávarútvegur, skipta verulegu máli við endurmótun íslensks atvinnulífs, eftir „sviðna jörð frjálshyggjunnar og græðgisvæðingu undanfarinna ára."

Varhugavert sé að draga úr vægi ofangreindra atvinnugreina innan stjórnsýslunnar á sama tíma og þjóðin þurfi öðru fremur að treysta á þessa málaflokka í þeim hremmingum sem nú ganga yfir.