Innlent

Íslenskir Indjánar

Líklegt er að fyrsta konan úr röðum frumbyggja Ameríku hafi komið til Evrópu fyrir tíma Kristófers Kólumbusar. Hún bjó hér á landi og um 350 íslendingar geta rakið ættir sínar í beinan kvenlegg til hennar. Þetta sýnir ný rannsókn Íslenskrar Erfðagreiningar.

Það var mastersneminn Sigríður Sunna Ebenesardóttir sem vann rannsóknina undir handleiðslu Agnars Helgasonar hjá Íslenskri erfðagreiningu. Í henni var reynt að rekja uppruna hvatvera erfðaefnis, arfgerða sem eru nokkuð óvenjulegar. Fyrri rannsóknir sýndu að uppruna íslendinga mætti rekja til Bretlands í kvenlegg og til Skandinavíu í karllegg.

Nokkrar arfgerðir sýndu hinsvegar arfgerðir sem kallaðar eru C1E og finnast helst í frumbyggjum Ameríku annarsvegar og úr hópi frá Austur-Asíu hinsvegar.

Rannsóknin sýndi að þesi arfgerð hefur verið lengi hér á landi, líklega fyrir árið 1500, eða áður en Kólumbus sigldi til Ameríku.

„Eins og staðan er í dag þá lítur það þannig út að það eru meiri líkur á því að þetta sé komið frá frumbyggjum Ameríku og þar sem það er fyrir tíma Kólumbusar hlýtur það að hafa gerst með siglingum norrænna manna til Vínlands. Þá er líklegt að einhver kona hafi flækst með í þeim siglingum frá Ameríku til Íslands, og það hafi verið fyrsta konan frá frumbyggjum Ameríku sem kom til Evrópu," segir Agnar.

Agnar tekur þó skýrt fram að um tilgátu sé að ræða, og svarið fáist ekki fyrr en eins afbrigði finnist annarsstaðar í heiminum.

Rannsókn þeirra Sigríðar hefur vakið heimsathygli og hefur Agnar verið í fjölmörgum viðtölum við erlenda miðla í dag.

„Ég held að þegar maður blandar saman Kólumbusi, frumbyggjum Ameríku og víkingum saman í einn kokteil þá vekur það áhuga. En það er mikilvægt að átta sig á því að þetta er ekki sönnun á því að þessi ferð hafi átt sér stað, heldur er það bara líklegasta tilgátan í dag. Það kann að vera að íslenska afbrigðið finnist í núlifandi frumbyggjum Ameríku, eða í beinagrindum frá þeim tíma sem þessar siglingar áttu sér stað, þá mun liggja fyrir staðfesting."

En hversu merkileg er þessi rannsókn?

„Ég myndi segja að fyrst og fremst sé hún áhugaverð út frá sagnfræðilegu sjónarhorni og ferðalögum manna á fyrri tímum. Hún umbyltir ekki vísindunum, en er áhugaverð og skemmtileg saga."

En er þessi dularfulla kona þá ættmóðir margra íslendinga?

„Ef það er rétt að þetta sé komið af því að kona kom frá Ameríku fyrir þúsund árum, þá geta að minnsta kosti 350 íslendingar rakið ættir sínar í beinan kvenlegg, til þessarar konu."





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.