Unglingar stöðvaðir á óskráðum torfæruhjólum

Lögreglan á Selfossi hafði afskipti af tveimur unglingspiltum í síðustu viku en þeir voru á óskráðum torfæruhjólum í Hveragerði. Akstur þeirra var talinn ógætilegur og hættulegur að auki voru bæði hjólin ótryggð.

Annar piltanna sinnti ekki stöðvunarmerkjum lögreglu og hvarf á braut. Hann fannst skömmu síðar og var boðaður ásamt forráðamönnum til viðtals á lögreglustöð.

Þá var umráðamaður ökutækis á Selfossi kærður fyrir að vera með litaða olíu á bifreið sinni. Mál hans verður sent til ákæruvalds til frekari meðferðar.

Vikan var annars róleg að sögn lögreglunnar.