Foreldrar uggandi yfir Bjarnarbolta - kennari segir gæsluna öfluga

„Þetta er nú búið að stórlagast. Einu sinni var það þannig að eina reglan væri sú að það mátti ekki koma við boltann með höndunum," segir Íþróttakennarinn Gunnar Magnús Jónsson um frekar umdeilt fótboltamót fjölbrautaskólans á Suðurnesjum. Mótið kallast Bjarnarbolti eða Bear Cup og hefur verið haldið árlega í um tíu ár.

Það er þó ekki öllum sama, foreldri sem sendi Vísi myndband af mótinu var beinlínis uggandi en þar má sjá hvernig ungmennin eru slegin utan undir af dómurunum, aðrir slást og stundum leysist mótið upp í hópslagsmál.

Öflug gæsla er á mótinu sem er iðulega haldið fyrir troðfullu húsi og enginn hefur slasast enn sem komið er að sögn Gunnars sem er einn þeirra sem hefur eftirlit með mótinu umdeilda.

Gunnar segir að nemendafélaginu sé skylt að skila inn leikreglum fyrir mótið sem er alræmt fyrir að vera heldur gróft. Meðal annars er dómarafyrirkomulagið sérkennilegt en hann er klæddur í uppþvottahanska. Annar hanskinn er rauður á meðan hinn er gulur. Þeir tákna gula og rauða spjaldið. Brjóti leikmaður af sér fær viðkomandi löðrung frá dómaranum. Fái hann semsagt gula spjaldið er hann sleginn utan undir með gula hanskanum.

„Skólayfirvöld tóku í taumana fyrir nokkrum árum og þá voru reglur settar á," segir Gunnar og bætir við að hann hiki ekki við að slaufa mótinu ef það virðist vera að fara úr böndunum.

Gunnar bætir við að mótið sér á mjög gráu svæði og umdeilt meðal skólayfirvalda. Aftur á móti sé þetta einn af hápunktum ársins hjá nemendum og því reynt að koma til móts við þá.

Enginn hefur slasast alvarlega á mótinu en Gunnar segir að einn nemandi hafi þurft að leita sér aðhlynningar á heilsuæslunni.

Það var þó ekki vegna átaka heldur slasaðist hann einfaldlega í fótboltanum sjálfum.

Gunnar útilokar samt ekki að fleiri hafi meiðst.

„Það er nú samt húmor í þessu og engin illindi," segir Gunnar og bætir við að stelpurnar láta sig ekki heldur vanta, eitt liðið sem tekur þátt í ár er einmitt eingöngu skipað stúlkum. Þær keppa við strákana og gefa ekkert undan að sögn Gunnars.