Hálka á Hellisheiði

Hálkublettir eru á Sandskeiði og í Þrengslum, hálka er á Hellisheiði samkvæmt tilkynningu frá Vegagerðinni.

Snjóþekja og éljagangur er á Bröttubrekku, hálkublettir eru á norðanverðu Snæfellsnesi og á Fróðárheiði. Hálka er á Vatnaleið og á Holtavörðuheiði þar sem einnig er éljagangur. Hálkublettir eru nokkuð víða á Vesturlandi.

Á Vestfjörðum eru hálkublettir í Ísafjarðardjúpi og hálka eða hálkublettir eru á fjallvegum.

Á Norðurlandi eru vegir víðast greiðfærir fyrir utan hálku á Lágheiði og hálkubletti í Hrútafirði, í Húnavatnssýslu, á Öxnadalsheiði og Hólasandi.

Á Austurlandi eru hálkublettir á fjallvegum.

Á Suður- og Suðausturlandi eru vegir greiðfærir.

Ásþungi.

Vakin er athygli á að þungatakmarkanir eru um allt land.