Rústabjörgunarsveitin kom heim í nótt

Liðsmenn íslensku alþjóðabjörgunarsveitarinnar komu heim til Íslands um tvöleytið í nótt. Sveitin hafði dvaldi í rúma viku við björgunarstörf á jarðskjálftasvæðinu á Haítí. Hún flaug með vél frá Iceland Express í fyrradag til Nassau á Bahamaeyjum en þar var gist í fyrrinótt. Þaðan var flogið til Halifax áður en sveitin sneri til Íslands.

Rætt var við tvo liðsmenn sveitarinnar þá Hákon Magnússon og Hjálmar Örn Guðmarsson í Bítinu á Bylgjunni í morgun. Þar sögðu þeir frá björgunarstarfinu á hamfarasvæðinu og því sem tekur nú við hjá liðsmönnum sveitarinnar. Báðir voru þeir á leið til vinnu eftir viðtalið þrátt fyrir að hafa komið heim til fjölskyldna sinna klukkan rúmlega þrjú í nótt.

Hægt er að hlusta á viðtalið hér.