Kanna áhrif niðurskurðar á líðan lækna

Allir starfandi læknar fengu í gær sendan spurningalista í tengslum við rannsókn á áhrifum niðurskurðar á líðan lækna hér á landi. Umfangsmikil langtímarannsókn í Noregi leiddi í ljós að þarlendir læknar eru óánægðari með lífið en aðrir starfshópar. Þeir eru einnig í mun meiri hættu á að fremja sjálfsvíg og misnota áfengi og lyf.

Meðal rannsakenda Íslandi er doktorsneminn Ingunn Bjarnadóttir Solberg. Leiðbeinandi er prófessor Reidar Tyssen við Óslóarháskóla en hann hefur haft yfirumsjón með samskonar rannsókn í Noregi.

„Ef svörun verður góð í þessari könnun gætu komið fram mjög áhugaverðar niðurstöður sem meðal annars stjórnvöld gætu varla litið framhjá," segir Ingunn.

Í tengslum við íslensku rannsóknina hafa spurningar verið þýddar yfir á íslensku. Svörin verða meðal þess sem notuð verða til að bera saman líðan íslenskra og norska lækna. „Úrvinnsla gagnanna hefst um leið og könnun líkur og niðurstaðna má vænta í sumar eða haust," segir Ingunn.