Gunnar Birgisson ekki í sérframboð

Gunnar Birgisson, fyrrverandi bæjarstjóri, lýsti yfir á bæjarstjórnarfundi í Kópavogi í dag að hann færi ekki í sérframboð. Hann var kosinn í bæjarráð fyrir Sjálfstæðisflokkinn á fundinum. Gunnar sóttist eftir oddvitasæti í prófkjöri sjálfstæðismanna í febrúar en hafnaði í því þriðja. Allt frá því að úrslitin lágu fyrir hefur verið uppi orðrómur um hugsanlegt sérframboð hans.

„Það er greinilega komið svar við skoðanakönnun sem gerð var fyrir 1/2 mánuði þar sem fylgi við sérframboð GIB var kannað. Sjálfstæðismenn sameinaðir á ný!" segir Guðríður Arnardóttir, oddviti Samfylkingarinnar í Kópavogi, á Facebook-síðu sinni. Þar vísar hún til þess að stuðningsmenn Gunnar gerðu nýverið könnun á fylgi flokka í bæjarfélaginu og einnig fylgi við hugsanlegt sérframboð Gunnars.

„Þetta er gert með minni vitund, þetta er hópur sem hefur áhuga á þessum málum," sagði Gunnar í samtali við DV í síðustu viku þegar hann var spurður hvort að könnunin væri gerð með vitund hans og vilja.