Íran vill efla menningartengsl við Ísland

Ólafur Ragnar Grímsson, forseti Íslands, hitti Seyed Hossein Rezvani, sem er nýr sendiherra frá Íran, í vikunni. Samkvæmt frétt sem birtist á heimasíðunni Fars news Agency mun Ólafur Ragnar hafa rætt við íranska sendiherrann um að styrkja tengsl Íslands við Íran.

Ólafur Ragnar sagði í samtali við íranska sendiherrann að Ísland væri reiðubúið til þess að flytja þekkingu og reynslu á fiskveiðum og jarðhita til Írans.

Rezvani lýsti því yfir á fundinum að hans þjóð væri reiðubúin að efla pólitísk og menningarleg tengsl við Ísland.

Þá lagði íranski sendiherrann áherslu á gagnkvæmar heimsóknir af pólitískum og efnahagslegum toga og óskaði eftir auknu samstarfi á milli landanna á sviði stjórnmála sem og einkageirans.

Rezvani hitti einnig Össur Skarphéðinsson, utanríkisráðherra í gær á öðrum fundi. Í frétt Fars fréttastofunnar segir að þar hafi þeir rætt um nýjustu þróun í samskiptum þjóðanna og önnur málefni.