Sigmar reyndi að tala Þórhall ofan af ákvörðun sinni

„Auðvitað virðir maður hans ákvörðun og hún er tekin algjörlega á hans forsendum en mér finnst mjög sárt að missa hann hérna úr húsinu," segir Sigmar Guðmundsson, sem er starfandi ritstjóri Kastljóssins, eftir að Þórhallur Gunnarsson sagði upp störfum í gær.

„Við erum búnir að eiga mjög gott samstarf. Hann er bæði virkilega flinkur ritstjóri og góður félagi og vinur þannig að það eru allir hálfslegnir hérna. Ég reyndi mikið að tala hann ofan af þessu, en það gekk ekki," segir Sigmar. Þórhallur hafi sagt sér frá því í gær að hann væri búinn að taka ákvörðun um þetta.

Sigmar segist ekki vita hvort hann muni taka við starfi ritstjóra Kastljóss til frambúðar. Hlutirnir hafi gerst svo hratt að hann og Páll Magnússon útvarpsstjóri hafi ekki haft tækifæri til að setjast niður og ræða hlutina almennilega. Sigmar viðurkennir þó að hann hafi metnað til þess að sinna starfinu til frambúðar.

Sigmar hefur hingað til sinnt fleiri verkefnum hjá RÚV en dagskrárgerð í Kastljósinu því að hann sér líka um hinn feykivinsæla þátt Útsvar ásamt Þóru Arnórsdóttur. Hann segist ekki vita hvaða áhrif breytingarnar hafi á þá vinnu. Það er öruggt að Útsvar klárar veturinn og ég myndi nú frekar hallast að því að sá þáttur lifði eitthvað lengur miðað við áhorfstölur og fleira," segir Sigmar.

Jóhanna Jóhannsdóttir er aðstoðardagskrárstjóri og mun gegna tímabundið stöðu dagskrárstjóra við brotthvarf Þórhalls.