Hafísinn færist nær

Hafís færist nær og nær landi. Landhelgisgæslunni barst tilkynning í hádeginu frá skipi sem leið átti um svæðið norðvestan af landi að hafísrönd lægi frá stað um 2 sjómílum norður af Óðinsboða að stað um 3,5 sjómílur austsuðaustur frá Horni.

Tvær spangir ná til lands á svæðinu frá Óðinsboða, önnur útaf Smiðjuvík og stakir jakar sunnan og vestan við þessa línu. Skyggni næst landi er tvær til fjórar sjómílur en hálf til ein sjómíla til norðurs. Skipstjóri mælir gegn ferðum um svæðið nema í björtu, að fram kemur í tilkynningu frá Landhelgisgæslunni.