Engin ákvörðun tekin fyrr en í lok apríl

Evrópusambandið „Að okkar mati verður ákvörðun um upphaf aðildarviðræðna við Ísland ekki tekin formlega á fundi leiðtoga Evrópusambandsríkjanna á fundi þeirra 25. og 26. mars, heldur á fundi ráðherraráðsins, líklega undir lok aprílmánaðar," segir Michael Stübgen, talsmaður Evrópumálanefndar þýska þingsins, en hún er stödd hér á landi.

Nefndina skipa fulltrúar allra flokka á þýska þinginu. Þeir voru einróma um að engrar andstöðu væri að vænta frá þýska sambandsþinginu við að aðildarviðræður ESB við Ísland hefjist hið fyrsta.

Samkvæmt nýjum lögum í Þýskalandi hefur þingið hins vegar rétt til að taka afstöðu til ákvarðana sem ráðherrar í ríkisstjórn Þýskalands taka á vettvangi Evrópusambandsins. Þingmenn þýsku sendinefnd-arinnar eiga allir sæti í Evrópunefnd þýska þingsins, sem þessa dagana vinnur að því að undirbúa málið fyrir þingið.

Stübgen segir að vinnu nefndarinnar gæti lokið fyrir 25. mars en málið gæti einnig dregist nokkrar vikur, eða fram í apríl.

„Sem stendur lítur út fyrir að formleg ákvörðun verði síðan tekin á fundi utanríkisráðs eða almenna ráðs Evrópusambandsins í lok apríl eða í byrjun maí," segir Stübgen. Bæði þessi ráð eru skipuð utanríkisráðherrum ESB-ríkja en ekki leiðtogum ríkjanna.

Leiðtogaráðið gæti þó sent frá sér yfirlýsingu, þar sem stuðningi er lýst við viðræður. Sú yfirlýsing hefði vissulega mikið vægi, en væri þó ekki formleg ákvörðun Evrópusambandsins.

Hann tekur fram að margt sé óljóst, bæði um ákvarðanatöku á vettvangi þýska þingsins vegna þessara nýju laga sem nú reynir á í fyrsta sinn, og á vettvangi Evrópusambandsins þar sem svo stutt er síðan Lissabon-sáttmálinn tók gildi.

Stübgen segir að aðild Íslands að Evrópusambandinu verði sambandinu kærkomin af ýmsum ástæðum. „Ísland hefur í mörg ár verið áreiðanlegur samstarfsaðili ES," segir hann, og nefnir meðal annars Evrópska efnahagssvæðið og Schengen-samninginn. „Á hinn bóginn höfum við tekið inn mörg ný aðildarríki á síðustu árum, sem hafa verið tiltölulega fátæk. Evrópusambandið er þannig uppbyggt að það hefur hjálpað þessum löndum að þróast, en satt að segja gleðjumst við sérstaklega þegar land fær aðild sem greiðir meira til sambandsins en það fær úr sjóðum þess, eins og tilfellið verður með Ísland."

gudsteinn@frettabladid.is