Ákærðir fyrir að smygla fjórum kílóum af amfetamíni til Íslands

Tveir karlmenn á fimmtugsaldri hafa verið ákærðir fyrir að flytja rétt tæplega fjögur kíló af amfetamíni til Íslands frá Rotterdam í Hollandi. Efnin komu til landsins í janúar með flutningaskipinu Arnarfelli en annar mannanna, Jónþór Þórisson, sótti efnin um borð í skipið á Íslandi. Lögreglan fann þau svo skömmu síðar innanklæða á honum.

Eftir að lögregla haldlagði fíkniefnin var gerviefnum komið fyrir í stað þeirra og að beiðni lögreglu afhenti Jónþór gerviefnin áfram til Garðars Héðins Sigurðssonar, sem er einnig ákærður í málinu, eins og til hafði staðið með fíkniefnin.

Í ákæruskjali segir að Garðar Héðinn hafi hitt Jónþór í nokkur skipti í Reykjavík á seinni hluta ársins 2009 og skipulögðu þeir þá innflutning efnanna. Garðar á að hafa móttekið fíkniefnin mánudaginn 4. janúar í Breda í Hollandi og haft þau í vörslum sínum ásamt óþekktum þriðja manni uns hann flutti þau til Rotterdam þar sem hann afhenti Jónþóri efnin þann 5. janúar í því skyni að hann flytti þau til Íslands og afhenti sér á ný.

Mennirnir játuðu sök í Héraðsdómi Reykjavíkur en halda því fram að þeir séu burðardýr.