Samgöngumiðstöð af stað í sumar

Gangi allt eftir geta framkvæmdir vegna samgöngumiðstöðvar í Vatnsmýri hafist í sumar. Hún mun standa við Hótel Loftleiðir. Möguleiki verður á tengingu á milli húsanna í framtíðinni.

Gert er ráð fyrir að húsið verði um 3.000 fermetrar, minna en áætlað var á tímabili, og geti nýst hvort sem flugvöllurinn verður áfram í Vatnsmýrinni eða ekki. Verkið verður unnið í áföngum og mun kostnaður við fyrsta áfanga vera á bilinu 1,3 til 1,4 milljarðar. Reiknað er með að um 80 til 90 heilsársstörf skapist á framkvæmdatímanum sem verður um tólf mánuðir.

Verði tillögurnar samþykktar verður hægt að auglýsa nýtt deiliskipulag á svæðinu. Ingvar Sverrisson, aðstoðarmaður samgönguráðherra, segir vonir standa til að framkvæmdir geti hafist í sumar.

Hrafn Magnússon, framkvæmdastjóri Landssambands lífeyrissjóða, segir lífeyrissjóðina vera í samningum við Flugstoðir, sem munu standa að framkvæmdum.

„Það mun ekki standa á okkur hvað varðar fjármögnun svo fremi sem semjist um ásættanleg kjör." Reiknað er með að endurgreiða kostnaðinn með 250 til 300 króna innritunargjaldi á hvern miða. - kóp