Innlent

Hvetur neytendur til þess að bíða átekta

Gísli Tryggvason, talsmaður neytenda.
Gísli Tryggvason, talsmaður neytenda.

„Ég hvet neytendur til þess að bíða átekta," segir Gísli Tryggvason, talsmaður neytenda, um tilmæli Seðlabanka Íslands og Fjármálaeftirlitsins sem voru kynnt í morgun.

Gísli telur tilmælin stangast á við lög og vitnar í samningslögin um að óvissa í samningum eigi að falla neytandanum í hag.

„Ég vitna líka í stjórnarskránna um formlegar heimildir þar sem það er lagt bann á að hlutast sé í niðurstöðum dómstóla," segir Gísli og biður neytendur um að bíða átekta þar til hann hefur sent frá sér opinber tilmæli sem hann mun birta á morgun.

Tilmæli Seðlabankans og FME eru afar umdeild en þar er bönkum ráðlagt að taka mið af vöxtum Seðlabankans í stað þeirra samningsvaxta sem finna má í samningum lántakenda. Lægstu vextir í samningunum eru allt að 2 prósent á meðan vextir Seðlabankans eru 8,25 prósent. Því er um verulegar breytingar á samningi að ræða, lánastofnunum í hag, að mati Gísla.

„Þetta er mjög óheppilegt og þvert á allar sáttartillögur. Þarna er farið eftir ýtrustu kröfum bankanna," segir Gísli sem er einnig afar ósáttur við að ekki var haft samráð við hann né önnur hagsmunasamtök neytenda.

Eftir að tilmæli Gísla birtast á morgun þurfa neytendur að ákveða hvort þeir greiði samkvæmt þeim tillögum. Sætti bankinn sig ekki við það þarf hann að lögsækja neytendur og þá verður úr því skorið hvort tilmæli Seðlabankans og FME séu rétt eða talsmann neytenda.








Tengdar fréttir

Dómstólar eiga síðasta orðið

Í yfirlýsingu ríkisstjórnarinnar vegna tilmæla Seðlabankans og Fjármálaeftirlitsins um gengistryggð lán segir að þótt tímabundin óvissa ríki um endanlega niðurstöðu dómstóla sé mikilvægt að stöðuleiki á fjármálamarkaði verði áfram tryggður. Ríkisstjórnin virðir sjálfstæði Seðlabankans og Fjármálaeftirlitsins og ber fullt traust til þessara stofnana við að sinna lögbundnu hlutverki sínu. Dómstólar eigi þó síðasta orðið varðandi réttarágreining sem enn er uppi vegna lánanna.

Tilmælin eiga að skapa festu í viðskiptum og traustu fjármálakerfi

Arnór Sighvatsson, aðstoðarseðlabankastjóri, segir að tilmæli Fjármálaeftirlitsins og Seðlabankans til fjármálafyrirtækja vegna óskuldbindandi gengistryggingarákvæða sé ætlað að skapa festu í viðskiptum og stuðla að öruggu fjármálakerfi. Með tilmælunum séu FME og Seðlabankinn að sinna þeirri lagaskyldu sem á þeim hvílir. Hann segir brýna almannahagsmuni krefjast þess að Seðlabankinn og Fjármálaeftirlitið setji fram almennar leikreglur sem varðveiti stöðugleika á meðan greitt sé úr réttaróvissu.

Lilja Mósesdóttir: Það á allt eftir að loga í málaferlum

„Það á allt eftir að loga í málaferlum,“ segir Lilja Mósesdóttir, þingmaður Vinstri grænna, um tilmæli Seðlabankans og Fjármálaeftirlitsins um að lánastofnanir eigi að fylgja óverðtryggðum vöxtum Seðlabankans, í stað samningsvaxta gengistryggðra lánasamninga.

Samningar verði endurreiknaðir miðað við vexti Seðlabankans

Fjármálaeftirlitið og Seðlabanki Íslands hafa sent fjármálafyrirtækjum þau tilmæli að þeim beri að endurreikna þau lán sem innihalda gengistryggingarákvæði sem eru óskuldbindandi samanber dóma Hæstaréttar. Ekki verði miðað við upphaflega vexti lánanna sem í mörgum tilvikum voru í kringum þrjú prósent, heldur vexti sem Seðlabankinn ákveður með hliðsjón af lægstu vöxtum sem nú gilda á lánamarkaði. Á vef Seðlabanka Íslands kemur fram að lægstu vextir á almennum óverðtryggðum útlánum er um 8,25% en á verðtryggðum lánum eru vextirnir 4,80%.

Segir Seðlabankann og FME hvetja til lögbrota

„Ég fæ ekki betur séð en að Seðlabankinn og Fjármálaeftirlitið séu að hvetja til lögbrota," segir Marinó G. Njálsson, hjá Hagsmunasamtökum heimilanna, um tilmæli sem Seðlabankinn og FME beina til fjármálafyrirtækja vegna gengistryggðra lánasamninga og var tilkynnt um í morgun.

Segja seðlabankann og FME hafa lýst yfir stríði

Samtök lánþega segja í yfirlýsingu að Seðlabanki og FME hafi í raun lýst yfir stríði á hendur almennum borgurum þessa lands með tilmælum sínum sem eftirlitsstofnanirnar tilkynntu í morgun. Þar var þeim tilmælum beint til fjármálafyrirtækja að fylgja vöxtum seðlabankans í stað þess að reikna úr lánin út frá samningsvöxtum. Vextir seðlabankans eru 8,25 prósent.

Segja ákvörðun FME og Seðlabankans vonbrigði

Neytendasamtökin segja tilmæli Seðlabanka Íslands og Fjármálaeftirlitsins vonbrigði. Neytendasamtökin hafa áður gefið út yfirlýsingu þar sem þau sögðu að samningsvextir ættu að standa þrátt fyrir að Hæstiréttur hefur dæmt gengistryggingu króna við erlendan gjaldmiðil ólögmæta.

Mest lesið


Fleiri fréttir

Sjá meira


×

Mest lesið