Hæstiréttur vísar frá kæru á hendur fréttamönnum

Hæstiréttur hefur vísað frá máli Ríkissaksóknara gegn fréttamönnunum Andra Ólafssyni og Breka Logasyni.

Ríkissaksóknari krafðist þess að þeim yrði gert að greiða réttarfarssekt vegna þess að þeir greindu frá atriðum sem komu fram í lokuðu réttarhaldi í mansalsmáli fyrir Héraðsdómi Reykjaness. Hæstiréttur komst að þeirri niðurstöðu að ekki sé í lögum gert ráð fyrir að málsaðili, sem er í þessu tilfelli Ríkissaksóknari, geri kröfu um réttarfarssekt. Því skorti lagaskilyrði fyrir að hinn kærði úrskurður væri kveðinn upp.

Áður hafði Héraðsdómur Reykjaness komist að þeirri niðurstöðu að þeim Andra og Breka skyldi ekki gert að greiða réttarfarssekt. Réttarfarssekt væri einungis hægt að leggja á þá sem væru viðstaddir réttarhald, en það voru þeir Breki og Andri ekki.