Banaslys í Norðurárdal

Banaslys varð í Skagafirði í Norðurárdal nyrðri þegar maður missti stjórn á bíl sínum og hafnaði út í Norðurá. Maðurinn, sem er útlendingur, fór úr höfuðborginni í gær áleiðis norður og þegar hann hafði ekki skilað sér var hafin leit að honum.

Lögregla og björgunarsveitir leituðu mannsins í dag með aðstoð þyrlu Landhelgisgæslunnar. Fréttaritari skagfirska miðilsins Feykis hefur verið á staðnum í dag og að hans sögn fannst maðurinn í bíl sínum á sjötta tímanum í kvöld.

Hann virðist hafa misst stjórn á bíl sínum og hafnað út í ánni. Staðhættir voru með þeim hætti að afar erfitt var að greina bílinn í ánni og því tók leitin eins langan tíma og raun bar vitni. Maðurinn er samkvæmt heimildum Feykis útlendingur sem búsettur hefur verið hér á landi um skeið.