Leigan fyrir skólann að sliga bæinn

1.700 milljóna króna leiguskuldbindingar Borgarbyggðar vegna Menntaskóla Borgarfjarðar valda sveitarfélaginu miklum erfiðleikum.

Eftirlitsnefnd með fjármálum sveitarfélaga hefur sent sveitarstjórninni bréf, þar sem segir að þessar skuldbindingar valdi mestu um að skuldir og skuldbindingar Borgarbyggðar eru yfir viðunandi mörkum.

Í bréfinu kemur fram að sveitarstjórnin vinni að því að ljúka samningum um framtíð mennta- og menningarhúss bæjarins.

Það er í eigu Menntaborgar, einkahlutafélags sem sveitarfélagið og Sparisjóður Mýrasýslu stofnuðu árið 2006. Félaginu var lagt til 150 milljóna hlutafé til að byggja húsnæði undir framhaldsskóla í Borgarnesi og sjá um rekstur þess. Skuldbindingar sveitarfélagsins tengdar þessu námu um 1.700 milljónum króna síðastliðið vor, að mati KPMG.

„EFS telur mikilvægt að allri óvissu vegna þess máls verði eytt svo fljótt sem auðið er og unnið verði markvisst að því að lækka skuldabyrði sveitarfélagsins,“ segir í bréfinu, sem EFS sendi á miðvikudag.

Eftirlitsnefndin hyggst fylgjast með fjármálum sveitarfélagsins og kallar eftir ársfjórðungslegum reikningsskilum um hvernig reksturinn samræmist fjárhagsáætlun ársins. Hún gerir ráð fyrir hallalausum rekstri Borgarbyggðar þetta árið. - pg