Forseti Maldíveyja heimsækir Ísland

Forseti Maldíveyja Mohamed Nasheed heimsækir Ísland á föstudag og laugardag til að kynna sér nýtingu hreinnar orku og sjávarútveg ásamt því að halda opinberan fyrirlestur um loftslagsbreytingar en hækkun sjávarborðs ógnar efnahagslífi landsins og sjálfri tilveru þjóðarinnar. Þetta kemur fram í tilkynningu frá forsetaembættinu.

Heimsóknin var ákveðin á fundi forseta Maldíveyja með Ólafi Ragnari Grímssyni, forseta Íslands, á Heimsþingi hreinnar orku sem haldið var í Abu Dhabi í janúar. Forseti Maldíveyja mun eiga fund með Ólafi Ragnari á Bessastöðum á morgun. Þá mun Nasheed eiga fundi með Jóhönnu Sigurðardóttur forsætisráðherra, Össuri Skarphéðinssyni utanríkisráðherra, Svandísi Svavarsdóttur umhverfisráðherra, Jóni Bjarnasyni sjávarútvegs- og landbúnaðarráðherra og Katrínu Júlíusdóttur iðnaðarráðherra.

Hélt hann ríkisstjórnarfund á hafsbotni

Laugardaginn klukkan 13:15 mun Nasheed halda fyrirlestur í Öskju í boði forseta Íslands og Háskóla Íslands. Fyrirlesturinn, sem opinn er öllum almenningi, fjallar um hættuna sem stafar af loftslagsbreytingum og ber heitið „Maldives: Fighting climate change from the frontline“.

Nasheed hefur á undanförnum árum vakið heimsathygli fyrir baráttu sína gegn loftslagsbreytingum. Fyrir nokkrum mánuðum hélt hann ríkisstjórnarfund á hafsbotni til að vekja athygli heimsbyggðarinnar á að Maldíveyjar gætu sokkið í sæ vegna bráðnunar íss og jökla, meðal annars á norðurslóðum.

Kynntar rannsóknir á íslenskum og grænlenskum jöklum

Þá munu forseti Maldíveyja og fylgdarlið hans sitja kynningarfundi um orkumál, sjávarútveg og bráðnun jökla á Íslandi og Grænlandi. Fjallað verður um nýtingu hreinnar orku á fundi í Hellisheiðarvirkjun þar sem forystumenn í orkumálum og sérfræðingar munu flytja erindi. Þá verður haldinn fundur um sjávarútvegsmál í Hafrannsóknarstofnuninni þar sem sérfræðingar í sjávarútvegi munu kynna árangur Íslendinga.

Íslenskir jöklafræðingar og náttúruvísindamenn munu svo kynna forsetanum rannsóknir á íslenskum og grænlenskum jöklum og á hafstraumum á norðurslóðum. Sú kynning fer fram í Öskju, náttúrufræðahúsi Háskóla Íslands.

Í fylgdarliði Nasheed eru meðal annars dr. Ahmed Shaheed utanríkisráðherra, embættismenn og sérfræðingar í alþjóðamálum.