Hjálp faðir ég zzzzzzzzz

Sænskur maður sem var svo langt niðri að hann var að íhuga sjálfsmorð hringdi í hjálparlínu til þess að leita sér aðstoðar.

Honum var gefið samband við vakthafandi prest sænsku kirkjunnar og bar upp við hann erindið.

Þegar hann hafði talað nokkra stund án þess að fá svar spurði hann prestinn hvort hann væri að skrifa niður minnispunkta.

Og hann fékk svar við þeirri spurningu. Presturinn hraut.

Sem betur fór varð þetta ekki til þess að auka örvæntingu mannsins. Hann varð þess í stað svo reiður að allar hugsanir um sjálfsmorð fóru út í veður og vind.

Breska blaðið Daily Telegraph hefur eftir Monicu Eckerdal Kjellström sem hefur umsjón með prestavöktum að þetta sé því miður ekki í fyrsta skipti sem prestur sofnar í miðju samtali.