Fíkniefnatík þefaði uppi amfetamín

Fíkniefnatíkin Luna þefaði uppi um 200 grömm af ætluðu amfetamíni í Vestmannaeyjum í gær. Efnin fundust í bifreið manns sem var að koma með Herjólfi frá Þorlákshöfn. Þegar maðurinn kom til Vestmannaeyja var hann færður á lögreglustöðina vegna gruns um fíkniefnamisferli. Fíkniefnatíkin Luna var þá kölluð til og þefaði hún uppi efnin.

Við yfirheyrslu játaði maðurinn, sem er á fertugsaldri, að hafa ætlað að selja efnið. Þá fannst einnig lítilræði af amfetamíni á tvítugum manni sem hafði verið farþegi í bílnum.

Í framhaldi af þessu voru gerðar húsleitir í þremur íbúðum og einum bát í Vestmannaeyjum. Þá var tvennt handtekið í kjölfarið, annarsvegar maður á sextugsaldri og svo kona á fertugsaldri.

Í tveimur íbúðunum fundust fíkniefni. Annars vegar 30 grömm af kannabisefnum og svo lítilsháttar af amfetamíni. Í báðum tilfellum viðurkenndu húsráðendur að eiga efnin sem þeir sögðu til eigin nota. Lögreglan naut aðstoðar fíkniefnatíkarinnar Lunu við leitirnar. Yfirheyrslur yfir þessum aðilum stóðu fram eftir nóttu, þeim var sleppt að skýrslutöku lokinni, en lögreglan telur málið upplýst.