Krefur lögreglustjóra um skýringar á dópleit

Róbert Spanó, umboðsmaður Alþingis, hefur skrifað Stefáni Eiríkssyni, lögreglustjóra á höfuðborgarsvæðinu, bréf þar sem hann krefur hann um svör vegna aðgerða lögreglu í Tækniskólanum á Skólavörðuholti í síðustu viku.

Fjölmennt lið lögreglumenn leitaði að fíkniefnum í húsnæðinu síðastliðinn fimmtudag að beiðni skólayfirvalda en leitin er liður í forvarnastarfi skólans. Þrír hundar voru notaðir í leitinni og var öllum inngöngum skólans, utan einum, lokað. Leifar af kannabisefnum fundust í dós inni á salerni.

Samkvæmt lögum um umboðsmann Alþingis getur umboðsmaður að eigin frumkvæði ákveðið að taka mál til meðferðar. Í bréfi Róberts segir að umfjöllun fjölmiðla um málið hafi orðið sér tilefni til að kanna hvort tilefni væri til þess að hann taki aðgerðir lögreglu í Tækniskólanum til athugunar að eigin frumkvæði.

Róbert vill vita um aðdraganda þess að leit var gerð í skólanum og hvernig leitin fór nákvæmlega fram. „Óska ég þá meðal annars eftir upplýsingum um hvert hafi verið tilefni leitarinnar og hvaða gögn og upplýsingar lögreglan hafi lagt til grundvallar þegar tekin var ákvörðun um að leita í Tækniskólanum í Reykjavík umræddan dag. Hef ég jafnframt í huga hvort leitað hafi verið „á nemendum" eins og kemur fram í einni af ofantilvitnaðri frétt, í skápum þeirra, skólatöskum o.þ.h.," segir í bréfi Róberts. Hann vill jafnframt vita á hvaða lagagrundvelli umrædd aðgerð fór fram.

Lögreglustjóri hefur frest til 1. mars til að svara bréfi umboðsmanns Alþingis.