Fjársvikamál gegn Guðmundi í Byrginu heldur áfram

Framhald aðalmeðferðar fer fram í fjárdráttarmáli gegn Guðmundi Jónssyni, sem oftast er kenndur við meðferðarheimilið Byrgið, í Héraðsdómi Suðurlands.

Hann er ákærður ásamt Jóni Arnarr Einarssyni fyrir að hafa dregið að sér hátt í 10 milljónir króna þegar hann var forstöðumaður Byrgisins. Jón Arnarr tók við sem forstöðumaður Byrgisins eftir að Guðmundur var ákærður fyrir kynferðisbrot gegn skjólstæðingum sínum.

Efnahagsbrotadeild ríkislögreglustjóra rannsakaði meint fjársvik Guðmundar í rúm tvö ár áður en gefin var út ákæra á hendur honum þar sem hann er ákærður fyrir stórfelld skattalaga- og auðgunarbrot.

Guðmundur var dæmdur í tveggja og hálfs árs fangelsi í Hæstarétti Íslands í byrjun desember 2008 fyrir kynferðisbrot gegn þremur stúlkum sem höfðu verið skjólstæðingar hans í Byrginu.