Meira en 270 milljónir renna frá Actavis til Haítí

Actavis hefur ákveðið að styrkja hjálparstarfið í kjölfar jarðskjálftans í Haítí um meira en 270 milljónir króna, í formi fjárstyrkja og lyfja. Í fréttatilkynningu frá Actavis kemur fram að lyfin séu send frá ýmsum löndum þar sem fyrirtækið starfi, meðal annars Íslandi, Búlgaríu, Tyrklandi, Bretlandi og Bandaríkjunum. Hluti framlagsins sé þegar kominn til viðtakenda.

Þar á meðal er 10.000 dollara fjárstyrkur til bandaríska Rauða krossins og lyf frá Actavis í Bandaríkjunum, og meira en 600-þúsund töflur af samheitalyfjum sem Actavis á Íslandi sendi SOS barnaþorpunum. Lyfin voru send til Dóminíska lýðveldisins og þaðan landleiðina til Haítí, sem er á sömu eyju. Unnið er að flutningi lyfja frá fleiri löndum.

Guðbjörg Edda Eggertsdóttir, aðstoðarforstjóri Actavis, segir að náttúruhamfarir sem þessar láti engan ósnortinn og Actavis hafi þegar í kjölfar jarðskjálftans ákveðið að leggja sitt af mörkum til að lina þjáningar bágstaddra í Haítí.