Eldgosið hægir á Eivöru Pálsdóttur

Eivör Pálsdóttir heldur útgáfutónleika í Íslensku óperunni í lok maí. Eivör hefur ekkert heyrt í ævisöguritara sínum og er orðin pínulítið stressuð.

„Ég hlakka mikið til að koma til Íslands. Ég er ekki búin að syngja mikið þar undanfarin ár og ég sakna Íslands voða mikið,“ segir færeyska söngkonan Eivör Pálsdóttir. Hún heldur útgáfutónleika í Íslensku óperunni 28. maí í tilefni af útkomu sjöttu hljóðversplötu sinnar, Larva, sem kemur í verslanir á þriðjudaginn.

Eivör var föst á Kastrup-flugvelli í Kaupmannahöfn vegna öskunnar úr Eyjafjallajökli þegar Fréttablaðið ræddi við hana. Útgáfutónleikar hennar í Færeyjum verða haldnir á miðvikudaginn og vonaðist hún eftir að komast í flug sem fyrst til að geta undirbúið sig.

Í Danmörku spilaði hún á ellefu tónleikum við góðar undirtektir en platan var tekin upp þar í landi. „Hún er miklu hrárri og er meira í átt að rokkmúsík og tilraunamennsku en ég hef verið að gera. Ég er að vinna með alls konar hljóðheima. Þetta eru aðeins meiri læti en fólk er vant að heyra frá mér,“ segir Eivör.

„Ég fór í hljóðver í Danmörku í tíu daga með hljómsveitinni minni og tók upp alla plötuna „live“ í hljóðverinu. Ég vildi ná þessari hráu, „live“ stemningu á plötuna sem ég er rosalega ánægð með.“

Komið hefur fram í fjölmiðlum að tónlistarbloggarinn Jens Guð sé að skrifa ævisögu Eivarar. Hún kannast við málið en hefur ekkert heyrt í Jens vegna bókarinnar.

„Eins lengi og maður má lesa þetta áður og vera með í þessu þá er þetta fínt. Ég er kannski pínulítið stressuð ef það kemur eitthvað út sem ég er ekki sátt við,“ segir hún. „Hann er búinn að tala við fólk sem þekkir mig en er ekki búinn að tala við mig.“ - fb