Friðarviðræður á ný

Beinar friðarviðræður Ísraela og Palestínumanna hófust í gær í Bandaríkjunum eftir tveggja ára hlé. Þátttakendur sögðust hóflega bjartsýnir, en stefna á að ljúka viðræðum innan árs með samningi um stofnun Palestínuríkis.

„Þetta tækifæri fæst ef til vill ekki fljótt aftur," sagði Barack Obama Bandaríkjaforseti, sem hafði boðið þeim Benjamín Netanjahú, forsætisráðherra Ísraels, og Mahmoud Abbas, forseta Palestínustjórnar, til viðræðna í Washington.

Viðræðurnar fóru fram í húsakynnum utanríkisráðuneytis Bandaríkjanna, undir stjórn Hillary Rodham Clinton utanríkis­ráðherra og George Mitchell, sérlegs sendifulltrúa Bandaríkjanna í málefnum Mið-Austurlanda.

Deilumálin eru í meginatriðum þau sömu og fyrr, nefnilega hvar endanleg landamæri ríkjanna eiga að liggja, hver verður staða Jerúsalemborgar og hvað verður um palestínska flóttamenn, svo nokkur þau erfiðustu séu nefnd.

Sem fyrr er óttast að andstæðingar viðræðna heima fyrir, bæði úr röðum Palestínumanna og Ísraela, muni gera sitt til að upp úr þeim slitni með því að fremja ofbeldisverk og ögra mótherjanum á alla lund.

Þetta sýndi sig þegar vopnaðir Hamasliðar skutu til bana fjóra ísraelska landtökumenn á Vesturbakkanum fyrr í vikunni, áður en viðræðurnar hófust.

Bæði Netanjahú og Abbas sögðu rétt að láta reyna á viðræður. Netanjahú sagði að hugsanlegur samningur yrði að tryggja fullkomlega öryggi Ísraela, en Abbas sagði að Ísraelar yrðu að gefa Palestínumönnum skýr merki um raunverulegan samningsvilja.

Innan fárra vikna mun reyna á það þegar sú frysting, sem Ísraelsstjórn setti í sumar í kjölfar harðra deilna á framkvæmdir ísraelskra landtökumanna, rennur út.

gudsteinn@frettabladid.is