Skerðingin á starfsfé LSH er 18 milljarðar

„Ef framlag ríkisins hefði haldist óbreytt síðasta áratug, og við hefðum stækkað í takt við samfélagið, hefðum við um átján milljörðum meira úr að spila en nú er,“ segir Björn Zoëga, forstjóri Landspítalans.

Framlag til Landspítalans sem hlutfall af heildarútgjöldum ríkisins hefur lækkað úr 9,32 prósentum í 5,88 prósent á áratug. Hlutfallið hélst um og yfir níu prósent til ársins 2007. Þetta kemur fram í starfsemisupplýsingum spítalans fyrir árið 2009 þar sem framlag ríkisins til spítalans árin 1999 til 2010 er sundurgreint. Framlag ríkisins árið 2010 er rúmlega 32 milljarðar.

„Þenslan í ríkisrekstrinum hefur ekki náð hingað. Talað er um að starfsmönnum ríkisins hafi fjölgað um fimmtán þúsund á síðustu árum en þeim hefur fækkað um 500 á LSH síðan spítalarnir voru sameinaðir árið 2000,“ segir Björn.

Stjórnvöld þurfa að skera fimmtíu milljarða króna til viðbótar af ríkisútgjöldum til að halda ákvæði stöðugleikasáttmálans, að mati Samtaka iðnaðarins. Frekari skattahækkanir koma ekki til greina á næstu þremur árum samkvæmt samkomulaginu.

Björn viðurkennir að niðurskurður af sömu stærðargráðu og á fjárlögum 2010, um 3,2 milljarðar króna, gæti þýtt fjöldauppsagnir á LSH eða að þjónusta sem nú þyki sjálfsögð verði aflögð. Eins þurfi að hafa hugfast að tækjabúnaður spítalans úreldist hratt og það sé fjárframlögum líknar- og félagasamtaka að þakka að spítalinn stendur ekki verr varðandi tækjakost en raun ber vitni. LSH notar þrisvar sinnum minna af sínu rekstrarfé til tækjakaupa en þau háskólasjúkrahús sem spítalinn ber sig saman við, eða um tvö prósent.

„Við erum komin í gjaldþrot hvað varðar tækjakaup og erum algjörlega háð líknarfélögum hvað þetta varðar. Það er ekki eðlilegt og óþekkt annars staðar.“

Björn segir að líftími lækningatækja sé almennt talinn fimm til sex ár. Hér eru tæki nýtt í áratug eða lengur.

„Við þurfum að neita okkur um að fá hingað nýjustu tækni. Það er nýlunda því LSH var vel tækjum búinn lengi vel.“

svavar@frettabladid.is