Hypjið ykkur burt af hótelinu

Golden Beach hótelið í Blackpool í Englandi er að verða heimsfrægt. Eigendunum til sárrar skapraunar.

Hótelið er nefnilega að verða frægt fyrir að reka krabbameinssjúkan gest og kærustu hans á dyr, eftir að hótelstjórinn sakaði þau um neikvæð skrif á ferðasíðu á netinu.

Blaðið USA Today er einn margra fjölmiðla um allan heim sem segja frá þeim Adrian Healey og Sherrie Andrews. Þau eru bæði 33 ára gömul. Fyrir einu og hálfu ári greindist Adrian með krabbamein.

Fyrr í þessum mánuði ákváðu þau að halda uppá að Adrian hafði lokið lyfjameðferð sinni með því að fara í þriggja daga frí til Blackpool sem er vinsæll strandbær rétt norðvestan við Manchester.

Adrian og Sherrie voru ekkert sérlega hrifin af hótelinu. Og þau voru ekki ein um það. Á ferðavefsíðunni TripAdvisor eru 167 umsagnir um Golden Beach. Fimmtíu og níu prósent skrifenda mæla ekki með hótelinu.

Hringdi í lögregluna

Það næsta sem þau vissu var að hótelstjórinn kom æðandi inn í herbergið þeirra og sagði þeim að hypja sig fyrir niðrandi skrif um hótelið. Hann hefði þegar hringt í lögregluna til að bera þau út ef þau færu ekki með góðu.

Lögreglan mætti svo á staðinn. Þeim var svo brugðið að þau samþykktu bara að fara. Þau áttu eina nótt eftir sem þau höfðu borgað fyrir og fóru fram á endurgreiðslu. Því var hafnað.

Neitar að svara spurningum

Lögreglan staðfesti í samtali við staðarblaðið Blackpool Gazette að hún hefði verið kölluð á hótelið. Talsmaður lögreglunnar sagði að parið hefði ekkert gert af sér en að hótelstjórinn hefði viljað losna við þau af eigninni. Lögreglumennirnir hefðu gefið þeim ráð um hvernig þau gætu sótt endurgreiðslu.

Hótelstjórnin neitaði að svara spurningum Blackpool Gazette um málið. En frægð hans mun berast víða.